ইণ্টাৰভিউ

ইণ্টাৰভিউ

:কওকচোন আলেকজেণ্ডাৰে ভাৰত আক্ৰমণ কিয় কৰিছিল?
:আলেকজেণ্ডাৰে ভাৰত আক্ৰমণ কৰাৰ আচল কাৰণটো কাকো কৈও যোৱা নাই কতো লিখি থৈও যোৱা নাই ছাৰ।
:কিতাপততো পাইছিল আগতে?
:মোৰ বুৰঞ্জী কিতাপখনৰ সেই পৃষ্টাটোকে মায়ে দেউতাৰ বাবে পথাৰলৈ চাহপানী নিওতে মেৰিগল্ড বিস্কুট দুখন বান্ধি নিছিল ছাৰ।
:কওকচোন
ইয়াণ্ডাবু সন্ধি কেতিয়া হৈছিল?
:অসমখন বৃটিছে লোৱাৰ আগত ছাৰ!
:অসমখননো বৃটিছে কেতিয়া লৈছিল?
:ইয়াণ্ডাবু সন্ধিৰ পাছত ছাৰ।
:আমাৰ জাতীয় পতাকাখনৰ মাজত কি থাকে?
:ফ্লেগ হষ্টিং কৰোতে নেকি ছাৰ?
:হব বাৰু। ফ্লেগ হষ্টিং কৰোতে কি থাকে তাকে কোৱাচোন!
:ফুল এসোপা বান্ধি থোৱা থাকে চাৰ!
:ফ্লেগ হষ্টিং নকৰোতে পতাকাখনৰ মাজত কি থাকে তেনেহলে?
:ফ্লেগ হষ্টিং নকৰোতে জাতীয় পতাকাখন নুৰিয়াই ঘুৰিয়াই বাকচত ভৰাই থোৱা হয় ছাৰ। গতিকে মাজত কি থাকে নাজানো।
:নামডাঙৰ শিলৰ সাকো কত আছে?
:৩৭ নং ৰাষ্ট্ৰীয় ঘাইপথটোতে আছে ছাৰ।
:কাজিৰঙা কত আছে?
:৩৭ নং ৰাষ্ট্ৰীয় ঘাইপথৰ কাষতে আছে ছাৰ।
:হব। হব।তোমাৰ যোগ্যতাৰ উমান পাই গৈছো।
:আচল যোগ্যতাৰ উমান এতিয়াও পোৱা নাই ছাৰ।
:সেইটোনো কি?
:আজি ৰাতি ৮ বজাত আপুনি কেন্দ্ৰীয় মন্ত্ৰী এজনৰ পৰা ফোন এটা যেতিয়া পাব মোৰ যোগ্যতাৰ উমান তেতিয়াই পাই যাব ছাৰ।