কথোপকথন (৩)

কালি পুৱা দেউতাৰ সতে কথোপকথন

:হেই হেই! কি কৰিছ, কি কৰিছ?
:গোলাপ ফুল এপাহ ছিঙিছো দেউতা।
:কেইজোপা ৰুইছিলি?
:এপাহহে ছিঙিছো দেউতা!
:এপাহ ছিঙো বুলি এমুঠিয়েই ছিঙিলি দেখোন।কেলেই ছিঙিছ?
:আজি দেউতা ROSE DAY
:ROSE DAYত গোলাপবোৰ ছিঙি পেলাব লাগেনেকি?
:আজি গোলাপফুল উপহাৰ দিব লাগে দেউতা।
:কাক দিব লাগে?
:নিজৰ আপোনজনক দেউতা।
:থ। থ।আমাক তই গোলাপ ফুল নিদিলেও হব।
:আপোনাক নহয় দেউতা।
:আও।আমাতকৈও আপোন আছেনে কোনোবা?
:বন্ধুক দিব লাগে।
:বন্ধুক যদি দিবই লাগে তেতিয়াহলে আমাৰ ঘৰতে গোলাপৰ ডাল কেবাটাও পচাই থোৱা আছে।তাকে দে।
:সেইবোৰ নিদিয়ে নহয়।ফুলহে দিয়ে।
:তেন্তে এইটো কিহৰ ROSE DAY অ? ৰজ দে'ৰ বাবে গোলাপ বোৰ যদি মাতৃৰ গছৰ পৰা ছিঙিয়েই পেলোৱা হয় তেনেহলে ৰজ দে'টো গছজোপাৰ বাবে আর্শীবাদ হবনে অভিশাপ হব?
হেৰ তাতকৈ যদি সেইদিনা গোলাপ ফুলৰ পচোৱা পুলি অলপকে উপহাৰ দিলিহলে তেতিয়াও ভাল কাম এটা হলহলে।
:তেনেকৈয়েতো চলি আছে দেউতা।
:তেনেকৈয়ে চলিছে যদি, ৰজ দে'ৰ দিনা গোলাপ ফুলবোৰ ছিঙি উপহাৰ দিয়াৰ দৰে চিলদ্ৰেন দেৰ দিনাও নিজৰ নিজৰ চিলদ্ৰেনবোৰ মাতৃৰ বুকু সুদা কৰি আনক উপহাৰ দিব লাগে। নিদিয়ে কিয়?
(কথাখিনি কৈ দেউতাই গোবৰ এচপৰা আনি গোলাপজোপাৰ গুৰিত দি দিলে)